Türkmenistanyň Prezidenti Serdar Berdimuhamedowyň Mongoliýa iki günlük döwlet sapary başlandy. Bu barada «Türkmenistan» gazetiniň elektron sahypasynda habar berildi.

Mongoliýanyň paýtagty Ulan-Bator şäheriniň «Buýant-Ukhaa» Halkara howa menzilinde belent mertebeli myhmanyň sapar bilen gelmegi mynasybetli Hormat garawulynyň esgerleri nyzama düzüldi.

Halkara howa menzilinde Serdar Berdimuhamedowy Mongoliýanyň resmi adamlary, şeýle-de Türkmenistanyň wekiliýetiniň agzalary mähirli garşyladylar. Bu ýerde döwlet Baştutanyna milli käsede mongol tagamy — gurt hödür edildi we gül gowşuryldy.

Türkmenistanyň Prezidentiniň dostlukly ýurda saparynyň dowamynda döwletara gatnaşyklaryň şertnama-hukuk binýadyny pugtalandyrjak ikitaraplaýyn resminamalara gol çekilmegi göz öňünde tutulýar.

Şeýle hem saparyň çäklerinde Türkmen-mongol işewürler forumy, sungat ussatlarynyň gatnaşmagynda medeni çäreler, milli amaly-haşam sungatynyň eserleriniň sergisi we türkmen halysynyň sergi-ýarmarkasy geçiriler.

Mälim bolşy ýaly, Türkmenistan bilen Mongoliýanyň arasynda diplomatik gatnaşyklar 1992-nji ýylda ýola goýuldy.

Türkmenistanyň Prezidentiniň Mongoliýa amala aşyrýan bu ilkinji saparynyň barşynda geçiriljek ýokary derejeli duşuşyklar we gepleşikler iki döwletiň arasynda dürli ugurlar boýunça netijeli hyzmatdaşlygyň pugtalandyrylmagynda hem-de giňeldilmeginde täze sahypany açar diýlip, habarda bellenilýär.