Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag şäherine iş saparyny amala aşyrdy we täze şäheriň ikinji tapgyrynyň çäginde gurulmagy meýilleşdirilýän desgalaryň şekil taslamalary bilen tanyşdy.

"Watan" habarlar gepleşiginde habar berlişi ýaly, gurluşyk işleriniň ýagdaýy we Arkadag şäherindäki metjidiň gurluşygynda ulanylýan serişdeler bilen tanşyp, türkmen halkynyň Milli Lideri tabşyrylan işleri üstünlikli ýerine ýetirmek üçin ýöriteleşdirilen desgalaryň utgaşdyrylan işini guramak barada birnäçe görkezmeleri berdi.

Bellenilişi ýaly, täze şäheriň çäginde gurulýan we gurulmagy meýilleşdirilýän desgalaryň ýokary hiliniň üpjün edilmegine, bezeg aýratynlyklarynyň häzirki zaman talaplaryna laýyk gelmegine uly üns berilýär. Şol bir wagtyň özünde, gurluşyk serişdeleriniň hili, olaryň berkligi bilen baglanyşykly meseleler hemişe gözegçilikde saklanýar.
Gahryman Arkadag görkezilen taslamalar we “Ahalteke atlar” şaýolunyň ugrunda ýerleşdiriljek heýkeller we duralgalaryň görnüşleri baradaky meýilnamalar bilen jikme-jik tanşyp, bu ugurda birnäçe maslahatlary berdi. Şol bir wagtyň özünde, Arkadag şäheriniň derejesini göz öňünde tutup, heýkelleriň we beýleki desgalaryň gözelligi, ykjamlygy möhüm talaplar hökmünde kesgitlenildi.

“Ahalteke atlar” şaýolunyň we onuň ugrundaky pyýada geçelgeleriniň gurluşygy barada durup geçen türkmen halkynyň Milli Lideri halkyň milli buýsanjyna öwrülen bedewleriň heýkelleriniň ýol ugrunda ýerleşdirilişiniň döwrüň ruhuna laýyk bolmagyna we berkligine zerur üns berilmelidigini aýtdy. Şeýle-de Türkmenistanyň at gazanan arhitektory Gurbanguly Berdimuhamedow "Ahalteke atlar" şaýolunyň ugrunda pyýada geçelgeleriniň, welosiped ýodalarynyň häzirki döwrüň talaplaryna we görkezijilerine laýyk gelmeginiň möhümdigini belledi. Şeýle hem şaýoluň ugrunda welosiped sürýänleriň duralgasynyň amatlylygyny üpjün etmäge aýratyn üns berilmelidigi aýdyldy. Halk Maslahatynyň Başlygy bu ugurdaky işleriň durmuşa geçirilmegine jogapkärçilikli çemeleşmegi tabşyrdy.