Türkmenistan daşary ýurt raýatlarynyň giriş tertibini ep-esli aňsatlaşdyrjak we ýurda syýahatçylaryňdyr işewürleriň köpelmegine goşant goşjak elektron wiza ulgamyny ornaşdyrýar. Bu barada penşenbe güni Aşgabatda geçirilen «Parahatçylyk, durnukly ösüş we migrasiýa» atly halkara maslahatda Türkmenistanyň Döwlet migrasiýa gullugynyň bilim bölüm başlygynyň orunbasary Ýusup Ödeýew aýtdy.

Onuň sözlerine görä, aprel aýynda Türkmenistanda «Migrasiýa hakynda» kanuna goşmaçalar we üýtgetmeler girizildi. Täze üýtgetmelere görä, elektron wiza (e-Visa) Türkmenistanyň Döwlet migrasiýa gullugynyň maglumat ulgamynda elektron görnüşde resmileşdirilýän resminama hökmünde kesgitlenýär. Bu resminama daşary ýurt raýatlaryna ýurda girmäge, onuň çäklerinde bolmaga, çykmaga, şeýle hem Türkmenistanyň üsti bilen üstaşyr geçmäge rugsat berýär.

Ol: «Elektron wizalaryň berilmegi wiza düzgünini ýönekeýleşdirmekde we ýurduň migrasiýa ulgamyny döwrebaplaşdyrmakda möhüm ädim bolar» diýip belledi.

Ödeýewiň belleýşi ýaly, sanly çözgütleriň durmuşa geçirilmegi resmi işleriň netijeliligini ýokarlandyrmaga we raýatlar, daşary ýurtly myhmanlar üçin ýokary derejeli amatlylygy hem-de aç-açanlygy üpjün etmäge gönükdirilendir. Täze çemeleşme administratiw işleri ýönekeýleşdirmeli we ýurda syýahatçylaryňdyr işewürlik akymlarynyň ösüşini ýeňilleşdirmeli.

Bilim bölüminiň başlygynyň orunbasary Türkmenistanyň migrasiýa ulgamyny has-da gowulandyrmak üçin Emeli aň we geljekki nesil seljeriş platformalaryny ulanmagyň mümkinçiliklerini öwrenýändigini aýtdy. Onuň sözlerine görä, EA-yň girizilmegi migrasiýa akymlaryny awtomatiki seljermek, ýüzi tanamak we biometrik maglumatlary, şeýle hem uly maglumatlar toplumyna esaslanýan töwekgelçiligi bahalandyrmak üçin giň mümkinçilikleri açar.

Ý.Ödeýew: «Akylly algoritmleriň ulanylmagy resminamany tassyklamagyň takyklygyny ep-esli ýokarlandyryp, amaly gaýtadan işlemegiň ugurlaryny optimallaşdyryp we goragy güýçlendirip biler» diýdi.

Utgaşykly görnüşde geçirilen maslahata Gazagystandan, Gyrgyz Respublikasyndan, Täjigistandan, Türkmenistandan hem-de Özbegistandan migrasiýa we migrasiýa syýasaty bilen bagly bolan meseleler bilen meşgullanýan döwlet düzümleriniň wekilleri gatnaşdylar. Şeýle hem çärä sebitde öňdebaryjy tejribesi bolan ýurtlardan, şol sanda Azerbaýjandan, Eýrandan, Russiýa Federasiýasyndan we Türkiýeden bilermenler hem-de halkara guramalarynyň wekilleri çagyryldy diýlip, Türkmenistanyň DIM-niň resmi saýtynda habar berildi.