Demokratik partiýanyň başlygy A. Serdarowyň ýolbaşçylygyndaky Türkmenistanyň wekiliýeti, 15-nji iýunda Şuşa şäherinde geçirilen «Täze dünýä tertibi: geosyýasy nukdaýnazarlar we ählumumy wehimler» atly halkara maslahata gatnaşdy.

Türkmenistanyň DIM-niň habar bermegine görä, forum «Ýeni Azerbaýjan» partiýasy tarapyndan guraldy we oňa Türkiýäniň, Gazagystanyň, Özbegistanyň, Täjigistanyň syýasatçylary, bilermenleri we partiýa wekilleri gatnaşdylar.
A. Serdarow öz çykyşynda Türkmenistanyň daşary syýasat strategiýasynyň esasyny düzýän hemişelik bitaraplyk hukuk derejesiniň hem-de parahatçylyk söýüjilikli syýasatynyň ähmiýetini nygtady.

Türkmenistanyň wekiliýetiniň saparynyň çäklerinde «Ýeni Azerbaýjan» partiýasynyň başlygynyň orunbasary Tair Budagow, Azerbaýjan Respublikasynyň Prezidentiniň Diwanynyň syýasy partiýalar we kanun çykaryjy häkimiýet bilen gatnaşyklar bölüminiň başlygy Adalýat Weliýew we Azerbaýjan Respublikasynyň Milli Mejlisiniň başlygynyň orunbasarlary Ziýafet Askerow hem-de Ali Ahmedow bilen duşuşyklar geçirildi.