Şu gün Awazada BMG-niň Deňze çykalgasy bolmadyk ösüp barýan döwletler boýunça üçünji maslahatynyň jemleýji plenar mejlisi geçirildi. Oňa deňze çykalgasy bolmadyk ösüp barýan döwletleriň, halkara guramalaryň ýokary wezipeli wekilleri, şeýle hem hususy pudagyň we raýat jemgyýetiniň wekilleri gatnaşdylar.

«Watan» habarlar gepleşiginde habar berlişi ýaly, mejlisiň dowamynda halkara maslahatyň çäklerinde geçirilen forumlaryň hem-de ýokary derejeli «tegelek stoluň» başyndaky söhbetdeşlikleriň netijeleri barada hasabatlar diňlenildi.

Şeýle hem Awaza syýasy Jarnamasynyň taslamasyna garaldy we Hereketleriň Awaza maksatnamasy yglan edildi.

Mejlisiň barşynda, onuň gün tertibiniň degişli bendine laýyklykda, maslahatyň hasabaty tassyklanyldy. Mejlise gatnaşyjylar hasabatyň BMG-niň Deňze çykalgasy bolmadyk ösüp barýan döwletler boýunça üçünji maslahatynyň esasy netijelerini hem-de maslahatlaryny beýan edýändigini, şeýle hem ýurtlaryň arasyndaky hyzmatdaşlygyň we raýdaşlygyň ýokary derejesini görkezýändigini bellediler.

Mejlisiň jemleýji bölegi maslahatyň ýapylyşyna bagyşlandy.