Aşgabat şäherindäki daşary ýurt dillerini çuňlaşdyryp öwredýän ýöriteleşdirilen 13-nji orta mekdepde robototehnika boýunça bäsleşik geçirildi.

Bu bäsleşige ýurdumyzyň dürli künjeklerinden gelen 60-a golaý ýaş inžener gatnaşyp, öz taslamalaryny — suwda çylşyrymly wezipeleri ýerine ýetirip bilýän robotlaşdyrylan gaýyklaryny hödürlediler.

Bäsleşik iki ugur boýunça geçirildi:

1. Tizlikde dürli hereketleri ýerine ýetirmek: gaýyklar göni ugurda ýüzmekde we päsgelçilikleri bolan ugurda çalt hereket etmekde bäsleşdiler.

2. Takyklyk we toparlaýyn iş: gatnaşyjylar suwuň ýüzünden toplary ýygnap, ýörite zolaga eltmelidiler.

«Tizlikde dürli hereketleri ýerine ýetirmek» ugry boýunça birinji orny Aşgabat şäherindäki ýöriteleşdirilen 87-nji orta mekdebiň okuwçysy, Türkmen-hindi maglumat tehnologiýalary merkeziniň diňleýjisi Ýasin Rahmanow eýeledi. Ikinji we üçünji orunlara daşary ýurt dillerini, himiýany we biologiýany çuňlaşdyryp öwredýän ýöriteleşdirilen 86-njy orta mekdebiň okuwçylary Orazmuhammet Merdanow we Seýit Annaýew dagy mynasyp boldy.

Toplary ýygnamak boýunça toparlaýyn ugurda birinji orny Türkmen-hindi maglumat tehnologiýalary merkeziniň topary gazandy. Toparyň düzüminde Arslanhan Toýjanow, Sergeý Apreseýan (Aşgabat şäherindäki 15-nji orta mekdep) we Alihan Akgaýew (A.S. Puşkin adyndaky Türkmen-rus bilelikdäki orta mekdebi) dagy çykyş etdi.

Ikinji orny Balkanabat şäherindäki «Kämil bilim» okuw merkeziniň topary eýeledi. Bu toparyň düzüminde Eldar Hajylyýew we Taňryberdi Gurbanow (Balkanabat şäherindäki tebigy-ylmy dersleri çuňlaşdyryp öwredýän 21-nji ýöriteleşdirilen mekdep), şeýle hem Gajyly Hajylyýew (Balkanabat şäherindäki iňlis dilini, fizikany we matematikany çuňlaşdyryp öwredýän 22-nji ýöriteleşdirilen mekdep) çykyş etdiler.

Üçünji orny Türkmen-hindi maglumat tehnologiýalary merkeziniň ikinji topary gazandy. Toparyň agzalary Aýhan Garýagdyýew (Aşgabat şäherindäki 15-nji orta mekdep), Yhlas Nurmuhammedow (iňlis dilini çuňlaşdyryp öwredýän 86-njy ýöriteleşdirilen orta mekdep) we Ýusup Geldiýew (iňlis dilini çuňlaşdyryp öwredýän 135-nji ýöriteleşdirilen orta mekdep).

Bäsleşigiň baş emini Ysmaýyl Hekimow bu bäsleşigiň diňe bir zehinli ýaşlary ýüze çykarmak bilen çäklenmän, olaryň tomusky dynç alyş döwründe kämilleşen ukyplaryny görkezmäge we tejribe alyşmaga mümkinçilik döredýändigini belledi.

Çäre Aşgabat şäheriniň Baş bilim müdirligi we «Döwrebap Maslahat» hususy kärhanasy tarapyndan guraldy. Ýeňijilere bu bäsleşigi guranlar tarapyndan gymmatly sowgatlar gowşuryldy.

Guramaçylar bu bäsleşigi tejribe alyşmak we ussatlygy görkezmek üçin möhüm meýdança hökmünde bolandygyny häsiýetlendirip, Türkmenistanda ýaşlaryň robototehnika we inženerlige bolan gyzyklanmasynyň ýylsaýyn artýandygyny bellediler.